Það er svo margt sem mennirnir leita að...

Sálir saman runnu
syngja englar enn.
Þeir hvorum áfram unnu
þótt ætíð væru menn.

Ekki dæma drauma
þó djúpir séu í raun.
Sálar vefur sauma
er svæfður hér á laun.

Þá reis úr ösku eldur
sem elskar alla menn.
Með hita hann því veldur
að hjörtun tifa enn.

-Hafsteinn Einarsson 2008

Hættur

Hef ákveðið að halda draumadagbókinni bara út af fyrir mig.

Draumarnir eru ekkert það spennandi og ef einhver myndi lesa þetta sem þekkti mig ekki myndi hann örugglega halda að ég væri e-ð andlega vanþroskaður.

Kastali

Ég er alltaf í e-u fornu umhverfi, kannski er ég gömul sál (ef það hugtak er til) en ég efa það samt sem áður.

Í nótt var ég sem sagt í e-m fornum kastala ásamt eðlisfræðikennaranum mínum sem þurfti álit mitt á jakkanum sem hann var í því hann var að fara á fund.

Svo eiginlega vaknaði ég.

Af hræðslu.

Kakan er lygi

Ég er staddur í hálfyfirgefnu hóteli sem allir skiptinemar á Íslandi búa í. Það á að halda veislu. Carsten sýnir mér hvar veislusalurinn er. Umhverfið minnir mig mest á yfirgefinn spítala frá seinni heimsstyrjöldinni en þegar borðið með veislukræsingunum stendur fyrir framan mig læt ég umhverfið ekki hafa áhrif á mig lengur.

Ég fæ að taka fyrstu sneiðina af kökunni. Í gleði minni sker ég kökuna í tvennt og tek annan helminginn. Ég sest niður og ætla að byrja að borða en sé að allir eru að horfa á mig - frekar illilega. Carsten kemur og segir að ég sé með of stóra sneið. Ég ætla þá kurteisislega að reyna að skila sneiðinni en ég get það ekki! Ég get ekki staðið upp, sit fastur í stólnum með sneiðina og get ekki hreyft mig. Fólk byrjar að verða pirrað á mér en ég get ekki sagt neitt svo ég vakna...

Próf, stolin útvarpsfront og utanlandsferðir

Skiptum ævintýrum þessarar nætur í þrjá hluta:

1. Ég er staddur í G stofu í gamla skóla. Bekkurinn er í prófi sem Guðbjartur situr yfir. Prófið hafði verið of langt svo við fengum daginn í dag til að klára það. Ég sit við hlið Vésteins sem hefur risastórt plaggat sem Hörður hafði búið til með öllum svörunum. Vésteinn lánar mér blaðið, ég er í tímaþröng svo ég verð að skrifa allt niður eins fljótt og auðið er. Á plaggatinu eru aðallega upplýsingar um hina og þessa RPG leiki sem ég hef spilað og prófið virtist snúast að mestu leyti um það.
2. Við erum stödd í flugvél á leiðinni til útlanda. Með í för er fullt af fólki sem ég þekki eða kannast við. Þegar á hótelið er komið (veit ekki hvaða landi) erum við öll saman í einu stóru herbergi og liggjum á sjúkrarúmum sem virðast vera rúmin okkar. Ein ákveðin manneskja í hópnum lætur mig ekki í friði og ég reyni að forðast hana. Ég hleyp því út í fótbolta með Herði fyrir utan hótelið og þannig endar sá draumur.
3. Ég er staddur á hlaðinu fyrir utan Spöngina. Það er stór pallbíll staddur fyrir framan mig en ég er bara áhorfandi í draumnum. Tveir piltar, sem ég hef aldrei séð áður svo ég viti, stela útvarpsfronti úr pallbílnum. Eigendur pallbílsins (þrír menn) verða fjúkandi reiðir og hefja eftirför á eftir þjófunum sem flýja í gamalli Hondu. Eltingaleikurinn liggur í gegnum Skeifuna (veit ekki hvernig) og endar fyrir utan Shell bensínstöðina á Ártúnshöfða þar sem gamla Ártúns stoppustöðin er. Stoppustöðin leit út eins og þegar ég var fimm ára og þjófarnir köstuðu frontinu í grasið. Lögreglan var nú með eigendum pallbílsins en gátu ekki sakað þjófana um neitt því þeir voru ekki með frontið. Þá hófst leit að frontinu en þjófarnir flýttu sér að ná í það og stinga því í gulan bónus plastpoka og lýstu yfir sigri standandi ofan á ruslagámi...

Jebb - þetta er svolítið súrt.

Martröð

Í nótt dreymdi mig ekki neitt

Í fyrrinótt fékk ég martröð sem er of gróf fyrir þau viðkvæmu hjörtu sem lesa þessa síðu.

Nördaþing og fótbolti

Er staddur á e-i stórri keppni (IMO, IChO eða IPhO) og Hörður er með mér. Við förum að spila fótbolta á e-m velli sem líkist einna helst tennisvelli en samt með fótboltamörkum. Völlurinn fyllist fljótt af keppendum svo Hörður ákveður að flýja og ég nenni ekki að vera einn svo ég elti hann.

Í næstu senu er ég hangandi í hengibrú sem liggur yfir öðrum fótboltavelli þar sem Hörður er að rústa litlum krökkum í fótbolta.

Já sæll...

Ekki örvænta

Enginn draumur í gær og svo gleymdi ég draumnum í fyrrdag þ.a. örvæntingafullir lesendur draumanna (sem eru held ég engir enn þá) verða að bíða rólegir.

Draumur 30. jan (blogger var bilað þá)

Í nótt dreymdi mig að ég bankaði upp á hjá Einari Sverri. Þótt ég hafi aldrei komið heim til hans og viti ekki hvernig húsið hans lítur út hafði ég e-a ákveðna hugmynd um húsagerðina greinilega. Við fórum í e-a tölvuleiki og hann átti hund sem virtist vera stærri útgáfa af mínum hundi.

Einhver stelpa sem bjó í sama húsi var e-ð að gagnrýna mig, man ekki alveg út af hverju. Loks bankaði vinur Einar upp á með snjóbrettið sitt. Það var snjór úti svo ég hringdi í Árna og Kjartan svo þeir gætu verið með.

Þótt Einar búi á Álftanesi var umhverfið eins og heima hjá mér þegar við fórum út, Árni og Kjarri birtust líka upp úr þurru með brettin sín og skyndilega hélt ég á mínu bretti. Bindingarnar voru samt bilaðar svo ég þurfti að liggja á mínu bretti og Einar var með sleða því hann á ekki bretti :)

Svo fórum við að renna okkur í e-i brekku, Kjartan datt allsvakalega á hausinn og enginn trúði honum nema ég.

The end.

Draumahöllin

Í nótt staldraði ég við í Draumahöllinni.

Draumahöllin er lítið ríki utan alheimsins þar sem ríkir friður og ró. Ég var staddur í forngrísku umhverfi, nokkrir vitringar sátu í hring við eld og ræddu heimspekileg málefni. Einn þeirra benti mér á hvelfingu þar rétt hjá sem var læst, bak við rimlana sá ég glitta í risavaxið hnattlíkan sem mig langaði að skoða betur.

Skyndilega sofnaði ég í draumnum og ég vaknaði sem „draugur“ í Draumahöllinni. Ég gat gengið í gegnum rimlana og sá þar lykil sem lá á vigt. Ef e-ð var tekið af vigtinni fór viðvörunarkerfi í gang. Ég var með annan lykil í vasanum sem ég skipti út fyrir hinn, gekk aftur til baka og „vaknaði“ handan rimlanna.

Í næstu svipan hitti ég stúlku sem leiðir litla bróður sinn. Þau vilja ólm taka mig með í skemmtigarð sem var handan hornsins. Í rauninni var hvað sem er handan hornsins, maður þurfti bara að ímynda sér það. Í sameiningu ímynduðum við okkur svakalegan skemmtigarð sem jafnaðist á við bestu Disney garða. Eftir nokkrar rússíbanaferðir og rölt langaði mig að prófa lykilinn sem mér hafði hlotnast.

Ég hljóp til baka, fram hjá vitringunum og opnaði hliðið. Við mér blasti risavaxni hnötturinn sem glóði með dularfullum bláum bjarma. Ég gekk nær og ákvað að snerta hann, ég leystist upp og var fluttur á annan stað.

Ég vaknaði í eldhúsi fullu af pappakössum. Það virtist vera í skipi því allt var á fleygiferð, ég gat ekki haldið jafnvægi og krabbar skriðu um gólfið. Það voru tvær hurðir á herberginu, báðar læstar. Skyndilega kom kokkur inn um aðra hurðina og bauð mér eina og aðeins eina ósk. Hann hvarf jafn skyndilega og hann birtist en jafnharðan kom annar kokkur í gegnum hinar dyrnar og sagðist ætla að uppfylla óskina mína.

Ég sá strax eftir þessari ósk. Ég var fastur í e-u eldhúsi sem ég vissi ekkert hvar var og krabbar klipu mig í tærnar sem var ekki þægilegt. Ég öskraði því þessi ósk var ekki það sem ég vildi...

Svo vaknaði ég í alvörunni.

Draumahöllin er ekki fyrir mig.

Garnir

Í nótt dreymdi mig mann sem var búið að skera á kviðinn. Hann hélt á þörmunum sínum og læknir var að þræða einhverju inn í þarmana.

Næst sá ég sjónarhorn þess sem læknirinn var að þræða inn en það skaut frá sér e-s konar sýru sem leysti upp agnir í þörmunum.

Mjög spes.

Lífið var yndislegt (ekki draumur)

Andleg köfnun

-höfnun.

Minningasöfnun

-í sögnum.

Liggja í lögnum

-enda í ögnum.

Vér framtíðinni ei fögnum.

Verður það áfram yndislegt?

(Góð tilraun til að vera póst póstmódernískur, huh?)

Nótt

Ég svaf illa í nótt, líklega því ég er e-ð kvefaður og veðrið úti hjálpaði ekki beint til.

Ég var staddur í e-s konar kassa. Inni í  kassanum lá götóttur maður, ég spurði hann af hverju hann væri með öll þessi göt. Hann svaraði ekki og annar maður sem stóð rétt hjá sagði: „Sérðu ekki?“ Þá leit ég aftur á manninn, hann hafði hvorki hendur né fætur, líkaminn var afskræmdur og gegnsæ plasthúð lá yfir hlutum af líkama hans sem virtist vera að hluta vélrænn. Þarna lá hann í eymd sinni og ég var að spyrja hvers vegna hann væri götóttur.

Ég fékk hroll og vaknaði kl. fkn sjö á sunnudagsmorgni.

Hjálp og sund

Það gerðust skrýtnir hlutir í nótt. Mig dreymdi tvo drauma sem voru svohljóðandi:

• Það er komið fólk heim til mín og það virðist ekki hætta að hjálpa mér. Bak við skápinn minn eru leynidyr að risastóru heimabíóherbergi með fullt af alls konar græjum sem fólkið er alltaf að kíkja inn í. Þau vilja líka endilega sýna mér risastóra gæludýraherbergið sem þau settu upp í kjallaranum. Það er frekar dimmt þar, stór gangur með þrem glerhurðum. Bak við hverjar dyr er svo fullt af dýrum, ég opna fyrstu dyrnar og dýrin hreinlega fljóta út! Maðurinn sem er að hjálpa mér týnir þau saman og m.a. svörtu ekkjuna (sem var víst ekki eitruð). Ég byrja að skoða dýrin og sé að nú á ég simpansa, aðra litla apa, fullt af fiskum, eðlum, snákum og dýr sem hugur minn bjó til á staðnum og ég hef ekki séð áður. Hjálpararni fóru allt í einu en komu svo aftur þrem dögum seinna því ég hafði gleymt að gefa dýrunum að borða.
• Hinn draumurinn var enn þá skrýtnari. Hann gerist í umhverfi kringum sundlaug. Ég er Mario og Gummi er Luigi (samt erum við alveg líkir sjálfum okkur). Markmið okkar er að reyna fá fleiri stig en hinn. Það eru spilakassar út um allt sem gefa frá sér „sveppi“ sem ég reyni að ná og get þá flogið, náð í fullt af peningum, séð hvar Gummi er og ýmislegt fleira. Þetta endar svo þegar ég kemst inn í e-r leynigöng og næ fullt af peningum (og vinn örugglega).

Það var þá ekki fleira í þetta skiptið :)

Flugvellir

Í nótt dreymdi mig að ég væri að koma heim úr fríi. Ég, Valborg og Bjarni (man ekki eftir fleirum) stigum út úr einkaþotu og löbbuðum fram hjá öllum biðröðum inn í landið. Á leiðinni í gegnum fríhöfninna varð ég fyrir mjög vandræðalegu atviki sem ég ætla ekki að segja frá hér. Ég ákvað svo að fara á undan til að sækja bílinn. Bíllinn var gamall Benz, blár á litinn með skrýtnum bláum lit sem ég kann ekki nafnið á. Hann lét illa af stjórn og ég klessti nokkrum sinnum á áður en ég náði að leggja fyrir framan flugvöllinn til að sækja Bjarna og Valborgu. Svo keyrði ég heim og ég vaknaði því ég var svo hræddur hvað ég keyrði hratt.

Sápa/slím

Í nótt dreymdi mig að ég væri útataður í sápu.

Stundum

Stundum man maður draumana ekki nógu vel.

Í nótt dreymdi mig tvo skrýtna drauma en ég man bara brot úr þeim svo þeir eru illskiljanlegir.

T.d. var ég

• Í garði fullum af skordýrum sem voru að skríða á mér.
• Að skera út Pokémon kalla úr tré (jafn fáránlegt og það virðist hljóma).
• Að koma heim til mín þar sem risastórt partí var í gangi en þegar ég steig inn um dyrnar var húsið tómt.
• Að hanga e-ð með bekknum mínum áður en við færum í skólann sem var um kvöldið en ekki morguninn.
• Að setja límmiða á tré.

Því miður er ekki mikið samræmi í þessu en ég vona að næsti draumur verði skýrari.

Skemmtistaðir og ríkið

Ég er í Kringlunni. Í hvert skipti sem mig dreymir Kringluna virkar hún á mig eins og Hogwart skóli. Leynigangar út um allt, faldar búðir og maður veit engan vegin hvar maður er (er Kringlan kannski bara þannig?).

Ég, Árni og Gummi röltum að nýjum skemmtistað og komumst inn. Við setjumst í þægilegan sófa og byrjum að drekka. Gluggarnir á skemmtistaðnum er mjög stórir og mér til mikillar furðu virðumst við vera í mörg hundruð metra hæð þegar ég lít út.

En jæja, við stijum þarna í makindum í sófanum þegar nefnd á vegum ríkisins ryðst skyndilega inn á staðinn. Kona sem minnir einna helst á einkaritara strunsar að okkur og biður okkur um skilríki. Við neitum því og þá byrjar hún að tala um að allir sem eru undir lögaldri á staðnum verði reknir út og þeir mæti ekki í vinnu næsta dag vegna brotsins. Þá spurði ég konuna hvort hún væri með vottorð fyrir þessu og hún sýnir mér nafnið á gamla yfirmanni mínum (sem ég var búinn að gleyma hvað hét, merkilegt nokk!). Við látum reka okkur út hið snarasta hæstánægðir með að þurfa ekki að mæta í vinnu næsta dag svo við byrjum að slæpast e-ð í Kringlunni.

Draumurinn endaði svo á því að villtumst í Kringlunni og komumst ekki heim :(

Dauði

Í nótt var ég staddur á fínu veitingahúsi með fjölskyldunni. Skyndilega kastaði ég frá mér fallegu kristalglasinu sem splundraðist í þúsund mola þegar ég greip ömmu mína. Það var um seinan - hún var dáin. Ég öskraði og vaknaði við það.

Köttur útí mýri, sett'upp á sig stýri, út'er ævintýri.

Júdó

Í nótt dreymdi mig að ég væri á júdóæfingu þar sem við æfðum aðallega spörk en líka lása.

Ekkert meira :(

Spil og krabbamein

Ég hef ákveðið að stofna til draumadagbókar á netinu þar sem draumarnir verða raunverulegri með hverjum deginum. Ég hef mest talið fimm drauma á einni nóttu hingað til og marga svo raunverulega að ég átti í erfiðleikum með að finna út hvort um svefn eða vöku væri að ræða. Dagbókin er aðallega fyrir sjálfan mig en staðsett hér til þæginda og fyrir aðra að njóta, vonandi skemmtið þið ykkur e-ð yfir þessum vægast sagt skrýtnu draumum.

Í nótt dreymdi mig tvo drauma sem ég man eftir en þeir voru frekar sundurlausir báðir.

1. Í fyrsta draumnum var ég staddur heima hjá ónefndum vini mínum þar sem okkur var tilkynnt að móðir hans væri nýlátin vegna krabbameins. Það sem furðaði mig mest við drauminn var að ég gat ekki trúað því að hún væri 20 ára en sá sem tilkynnti okkur andlátið var fastur á því. Við kipptum okkur svo ekkert frekar upp við þessa tilkynningu.
2. Næst erum við stödd í gamla sumarbústaðnum mínum þar sem ég, Erlingur, Gummi og Carsten spilum eitt skemmtilegasta spil sem ég hef nokkurn tíman spilað. Ég á erfitt með að lýsa því en það var fjandi skemmtilegt! Svona eins og blanda af Risk og e-m herkænskuleikjum. Spilið gengur hins vegar ekki vel því Gummi er mjög tapsár og hrindir öllu af spilaborðinu þegar hann lendir í slæmri stöðu en svo svindlar hann einnig ákaft.

Það var þá ekki fleira í bili, vonandi dreymir mig e-ð skemmtilegt í nótt :)